西柚減肥法(個人經驗+心得)

上網睇左好多西柚減肥法嘅資料資訊，累積左咁多資料同資訊暫時得出以下心得，
當然循例都要Post個餐單出黎，加埋個人經驗同心得。

早餐
半個西柚或者250毫升嘅西柚汁
(如果唔知250毫升有幾多，直接用個半個西柚榨汁，但因為市面上有好多唔同Size嘅西柚，我自己個人經驗所得，大約兩大啖嘅西柚汁就差唔多，留意只係個人經驗，最好都係食半個啦)

仲有雞蛋兩隻同兩塊煙肉(任何煮法，煎炸都得)

雖然話就話煎炸都得，但我頭四日我揀左烚蛋同用焗爐焗煙肉！
頭三日都無輕，第四日，係突然輕左四磅。但我唔知有無關係。
之後既日子，我都只係間唔中烚蛋。
去到最後兩至三日無食旦，雖然話減肥為健康，
但生日兩隻蛋，膽固醇係好高，不過煙肉keep住日日食。

為左配合番工，如如果一早起身，要將煙肉解凍，再煮，的確好浪費時間，
所以我每次都會一早煮定四至五日既份量，只要朝早起身放入多士焗爐焗番熱就食得。

午餐
半個西柚或者250毫升嘅西柚汁

沙律是必需的，而且最好係以凱撒沙律類型為佳，
因為都係綠色蔬菜為主，用少少沙律油會更加好。
調味可以落少量芝士碎。沙律都可以有蕃茄，新鮮嘅水果。
但唔可以有薯仔，蘋果同栗米。因為太多澱粉質。

肉類(食到飽)
雖然係咁，我自己黎講都會食三條雞柳或兩塊太約手掌咁大嘅豬或牛扒
因為我自己唔食海鮮，所以分享唔到太多海鮮既資訊。
不過可以用水浸吞拿魚沙律都唔錯架。

午餐可以食飽D

如果出街食，我會飲一杯檸檬茶走甜！

走甜係必需的！

下午茶，想食下午茶就真係諗太多！
如果真係餓，飲多杯水啦，或者脫脂奶

晚餐
半個西柚或者250毫升嘅西柚汁

可以揀食沙律或者綠色蔬菜
通常我會炒一大碟芥蘭苖當然少d油啦，
初初我都會依足餐單照食好多肉，但後期發現，晚餐食少D真會瘦得更快。
所以如果自己身體ok，可以連肉都盡量唔食。


宵夜
蕃茄汁或脫脂奶一杯

不過我一向為宵夜既習慣，所以未試過。


以上餐單係自己上網搵西柚減肥法，自己試過再調整過

官方餐單一直都話要食綠色蔬菜，但原來可以食椰菜花架。
當然綠色蔬菜會最好啦。
同埋因為西柚會降血壓，所以如果食得多，覺得暈，就唔好食夜晚嗰半個。
變成一日一個西柚，減肥姐，都要健康。加油！！